கனல்கவி
கவிஞர் பொன்.இளையகுமார்

புல்வெளியில் போர்வைகள்
ஏதும் இன்றியே
படுத்துறங்கும் வெண்பனிகளை
துயில்லெழுப்ப மறந்ததோ ! (கம்பா)

நண்டூறும் வயலில்
பெண்டூறக் கண்டும்
விளையும் பயிருக்கு
உரமாகும் வியர்வைகளையா ? (கம்பா)

நெடுநெல் போனது
குறுநெல் வாழ்வை
குறைத்திடும் குறிப்பறிதலை
உரைத்திடடக் கூடலையோ ! (கம்பா)

கொஞ்சும் இயற்கைகைக்கு
கொஞ்சம் இடமில்லை
நஞ்சாகும் பூமியிலே
மிஞ்சுமோ கானிகளும் ? (கம்பா)

தீராவறுமைத் தெண்பட்டது
உண்டா கம்பா ?
வம்பில்லை நம்பு
பொதுவுடமை சொல்லு ! (கம்பா)

அறம்சாட வாழ்வியலில்
குறளோடு நில்லு ,
வளைந்தாலும் அரசியலை
அடியோடுக் கொல்லு ! (கம்பா)

மலர்களில் ஊடே
மகரந்தத்தில் தேனூரும்
இன்பம் தீண்டல்
தீர்க்கும் என்றாயே ! (கம்பா)

அந்திச் சுடும்
பிரிவின் வலி
ஆற்றாக் கடையாய்
ஊடல் தீர்க்குமோ ?(கம்பா)

அடுக்கடுக்காய் பொய்
சொன்னாயே கம்பா
அதிலாவது சேர்த்திருக்கலாமே
சாதிகள் பொய்யென்று ! (கம்பா)

யுத்தத்தைத் தவிர்த்து
மொத்தத்தைச் சொல்வேன்
கம்பன் பாடாத
வரி(லி)களை பாடவருகின்றேன் !

புரட்சி ஓங்குக…..

முத்துராக்கு

மனிதம் போற்றுவோம்.
####################
மண்ணில் பிறந்த மக்கள் சமமே/
மடமைத் தனமே மனிதரில் சாதிகள்/
விண்ணில் இருந்து பிறந்தவர் எவரோ/
வேற்றுமை எதற்கு விரும்புவோம் மக்களை/
கண்ணில் தூசெனில் கண்ணீர் கலங்கும்/
கருத்தில் பிழையெனில் கடமை தவறும்/
எண்ணிடக் குறைகள் எளிதாய் விளங்கும்/
என்றும் ஒற்றுமை ஏற்றம் கொடுக்கும்.

பெண்ணும் ஆணும் பிறப்பால் சரிநிகர்/
பேதம் பார்த்தால் பெருந்துயர் சேரும்.
உண்ணும் உணவு உடுக்க உடையுடன்/
உறங்க வீடும் உரிமை ஆகுமே/
திண்ணம் உயர்வு திறனுடன் கற்றிடத்/
தேசம் படிப்பை இலவசம் ஆக்குக/
வண்ணம் பலவாய் பூக்கள் இருந்தும்/
வற்றா மணமே வாகாய் ஈர்க்கும்.
பொ.முத்துராக்கு.03.07.2023.

அத்தனை வண்ணங்களிலும் கொடிகள் பறக்கின்றன
தேசம் விற்கப்பட்டுவிட்டது

இப்போது அந்த விழா
ஒரு பழக்கம் அவ்வளவுதான்

சில பாடல்கள் ஒலிப்பதாலோ
சில கொடிகள் பறப்பதாலோ
சிலர் பதக்கங்கள் பெறுவதாலோ
சிலர் உரைகள் நிகழ்த்துவதாலோ
அது
அந்தநாள் ஆகிவிடாது

மின்கம்பி வேலிகளில் அடிபட்டுச் சாகும்
யானைகள்
காடிழந்த கதையைப் பிளிறுகின்றன மரணத்தறுவாயில்
அதை
நாடிழந்த மனிதர்கள் கேட்கிறார்கள்
கூடிழந்த பறவைகளின் கூக்குரல் போல் ஒலிக்கிறது அது

வீடிழந்த மனிதர்களின் முன்
பிளிறும் பொக்லின்கள்
மதங்கொண்ட யானையைப்போல்
குடிசைகளைப் பிய்த்தெறியும்போது

எங்கே சுதந்திரம்?
யாருக்கு?

கோ.கலியமூர்த்தி